عمر نجم قلبه اللى كان بفته

هى السنين ببلاش
و الا مفيش فايدة ؟
جاوبنى يا بكرة!

إبنى

***

كانت بدايته من حيث أن توقف من سبقه، رحل الآباء وتركوا الأبناء يكملون طريقهم، منهم من انكسر سريعاً، ومنهم انحرف به الطريق عند مفرق الطرق، ومنهم من حاول أن يبتدع طريقا آخرا، ومنهم من كان يحاول أن يبدع طريقا آخرا ولا يزال، لكن كان هناك شاعرا ينضج أسرع ممن هم فى نفس مرحلته، عمر نجم، كان يحمل فى داخله صوته الشعرى الخاص رغم أن بداياته الشعرية تكشف مدى تأثره بفؤاد حداد، فى أعوامه الأخيرة -قبل ان يختطفه الموت منا- كان اتقرب من تحقيق مشروعه الخاص وإكمال رصف الطريق القديم ليترك أثرا لا يمحى فى تاريخ شعر العامية المصرية

عمر نجم والذى أدرك مهمته ودوره وهدفه مبكرا -فى فتره أواخر الثمانينات- علم أن العقد القادم -فترة التسعينات- ستنبئ عن جفاف وجدب سيصيب حركة المصريين فى ظل تفكك طبقات وطوائف الشعب عن بعضها وقد كان ما تنبأ لنا

أصابه مرض الشك والحيره والخوف من المستقبل، كان يحلم ويتمنى ويأمل بمستقبل مختلف لكنه شك فى فكره تحقق أمنياته، لكنه لم يهرب من الواقع المؤلم كما فعل البعض بل انغمس فيه حتى النخاع، ولم ينفرد بذاته بعيدا عن ناسه وأهله خوفا من واقعهم المرير، بل حرقها ليضئ جوانب الطريق منتظرا يوم عودة حلمنا الضائع لواقعنا.

عمر نجم قال "أنا مش نبى" وهذا صحيح، فهو لم يبشرنا بالخلاص -وإن كان يتمناه-لأنه لم يعرف له طريقاً.

***

وكأن مش باقى
غير إنى أرثى
من زمان مسكون ببكرة
إنما مسجون بأمسى
أنا اللى مولود فى وقفتك يا بورسعيد
وأنا اللى كان سبوعى
زغروطة فى زفة شهيد
وأنا اللى فى خمسة يونيه
طلقت مريلتى ، وصاحبت نضارتى
وقطعت طيارتى الورق
ولبستلك كاكى
بأموت
لو الشجر ف احضانك
ينام باكى
غنيت مع القمرى وفتحت شباكى
لما اللمض عيطت والنور بقى مزرّق
أنا قلبى كان بفته
أنا قلبى اصبح أرق
من نسمة حواريكى
طبطبت على كتفك وقولتلك بوحى
وهبتلك روحى
وقعدت أستنى مع الباقيين هلال العيد
من امتى بأستنى ومفيش جديد
إلا انكسارى
والشيبة من بدرى
وهزيمتى م التجاعيد ؟
مشنوق على سلك الكهربا دلتا وصعيد
مشنوق وفوق المصطبة سهران وحيد
مشتاق أناجى القمر أتاريه مخاصمنى
أنا اللى راضع مواويله وبيضه فاطمنى
وأنا اللى كان القمر يندهلى ف المواعيد
لا صرختى واصله
أو صوتى ... أو همسى
وكأن مش باقى
غير .. إنى .. أرثى

سبتمبر 1991

ديوان الشاعر عمر نجم – غياب الحضور ، و حضور الغياب- مكتبة الأسرة

عبد الرحمن الأبنودى - أرقص على السلم

.. سلم قلوعك للغروب.. والغربة
واعجن.. وكل واشرب بقَّية زادك
.. ولا انت واصل بالقلوع.. لأوروبا
ولا انت راجع بالقلوع لبلادك
ف يا شاب
يا معلَّم.. يا متعلِّم
ارقص على السلِّم

.. يا صهد.. يا شاوح
.. ضلل على الرايح
فى اليم ... من غير يمّ
الجفن من غير عين
والزند من غير دم
.. ويا شاب يا مطفى العيون الماس
راح الحماس .. و قعدت ف الضّلة
كشفت عريك فى البلاد للناس
وتاجرت فى الأشعار و فى الفُعلا
لا دين
ولا مَّلــة
لا وصلت ..لا رجعت
لا منوّر و لا مضلِّم
.. الحق قام
والكره قام
... لا قمت تتكلم... و لا تسلِّم
فارقص على السلم

ديوان "الزحمة" لعبد الرحمن الأبنودى – الهيئة العامة للكتاب

بيرم التونسى - المجلس البلدى

قدر مصر... أن يكون إثنان من أعظم شعراء عاميتها... أحدهما تونسى والآخر شاميا... ولكنهما مصريان قلبا وقالبا... شعراء عاشا مصر ووصفوها كما لم يعشها ويصفها أحد قبلهما من شعراء العصر الحديث... هما محمود بيرم التونسى وفؤاد حداد

*****

تعتبر هذة القصيدة من أوائل أعمال بيرم، وكان قبل كتابة هذه القصيدة فى هذه الفترة قد أطلع على قصائد إبن الرومى وغيره من كبار أعلام الشعر العربى، وقرأ الكثير من السير الشعبية مثل (ألف ليلة وليلة، سيرة عنترة، سيف بن ذى يزن)، وتأثر فى نشأته الأدبية بروح الهجاء والسخرية والنزعة النقدية فى شعر إبن الرومى وأزجال "محمد توفيق" وهو زجال مأجور استعمله الخديوى لمهاجمة الشيخ محمد عبده والتشهير به والتهكم عليه واضطهاده فى صورة فردية، وكان "محمد توفيق" يتمتع بأسلوب قوى فى السخرية والتهكم والهجاء، وقد أخذ عنه بيرم تلك الروح، لكنه أخذ عليه انسياقه فى ركاب السلطة وتحوله إلى بوق مأجور للسلطان.

وقد كتب بيرم فى هذة الفترة الكثير من القصائد والأزجال لكنه مزقها ظنا منه إنها دون المستوى، أما البداية الحقيقة التى وجهت بيرم لإحتراف مهنة الأدب، فكانت عندما طالبه المجلس البلدى بمبلغ كبير كعوائد عن المنزل الصغير الجديد الذى اشتراه، فكتب بيرم هذة القصيدة –والتى يعتبرها البعض من الشعر الحلمنتشى- وذهب بها إلى جريدة "الأهالى" فأعجب بها رئيس تحريرها "عبد القادر حمزة" ونشرها، وقرر بيرم بعد هذة القصيدة إحتراف مهنة الأدب، لأنها قد راجت رواجاً عظيماً على ألسنة الناس والعامة وقتها وطبعها بيرم فى كتيبات عدة مع قصائد أخرى.

*****
قد أوقع القلب فـى الأشجان والكمد .:. هـوى حبــــــيب يســـمى المجلس البلدى
مـا شـرد النـوم عن جفـنـى القريـح .:. سوى طيف الخيال خيال المجلس البلدى
إذا الرغــيف أتـى فالنصـــف آكلــه .:. والنصــــــــف أتركـــــــه للمجلس البلدى
وإن جلسـت فجيـبى لســـت أتركــه .:. خوف اللصوص وخـوف المجلس البلدى
وما كسـوت عيالى فى الشتــاء ولا .:. فـى الصيــف إلا كســوت المجلس البلدى
كـأن أمــى بـلَّ الله تربتـها أوصــت .:. فقـــــــــالت أخـــــــــــوك المجلس البلدى
أخشى الزواج فإن يوم الزواج أتى .:. يبــقى عروسـى صديقـى المجلس البلدى
وربمـا وهـــب الرحــمن لــى ولـداً .:. فــى بطــــــنها يدعــــــيه المجلس البلدى

يــا بــائع الفــجل بالملـــيم واحــدة .:. كــم للعـــــــيال وكـــــــــم للمجلس البلدى

*****

 المصادر:
أمير شعراء العامية بيرم التونسى – عاطف عمارة – دار الحرية

المجموعة الكاملة لشاعر الشعب بيرم التونسى – مكتبة مصر

الأصمعى - صوت صفير البلبل

ملحوظة : لا تقرأ القصيدة إلا بصوت مسموع

***

سأظل مدين لمدرسى للغة العربية فى المرحلة الأعدادية بتحفيظى القصة والقصيدة

***

يحكى أن أحد الخلفاء العباسيون ببغداد على عهد الأصمعى (ولا أذكر من هو تحديداً) كان يكره بذل العطايا مقابل مديح الشعراء، فقرر إقامة ما يشبه المسابقة بينهم فى كتابة قصيدة مديح لم تكتب من قبل، ويعطى مقابل ما كتب القصيدة عليه ذهباً، فتسابق الشعراء فى كتابة المدائح، ثم ذهبوا إليه، فأدخلهم واحدا تلو الآخر، وكان هذا الخليفة يستطيع حفظ القصيدة بأكملها من القراءة الأولى، وكانت له غلام يحفظ القصيدة من القراءة الثانية،وجارية تحفظ القصيدة من الثالثة، فيدخل الشاعر ويلقى قصيدته حتى النهاية، فيقول الخليفة للشاعر معلقاً على قصيدته"قد سمعنا هذة القصيدة من قبل"، فيرد الشاعر عليه متعجباً "كيف يا مولاى وهى من نظمى؟"، فيرد عليه الخليفة غاضباً "ألا تصدقنى ؟" ثم يلقيها عليه كاملة، فيتعجب الشاعر من ذلك ويزيد الخليفة من تعجبه قائلاً "ولى غلام قد سمعها من قبل أيضاً، استدعوا الغلام"، ويأتى الغلام الذى كان مختفياً وقد سمع القصيدة لمرة الثانية، فيقول الخليفة للغلام آمراً "أسمعه ما يدعى أنها قصيدته"، فيلقى الغلام القصيدة كاملة للمرة الثالثة، فيزداد الشاعر تعجباً لكنه ينظر متشككاً، وعندما يرى الخليفة نظرة الشك فى عينيه، يبلغه بالقاضية "ولى أيضا جارية قد سمعت هذة من قبل، استدعوا الجارية"، وتأتى الجارية المختبئة وتلقى القصيدة كاملة للمرة الرابعة، فيخرج الشاعر من بلاط الخليفة متعجباً شاعراً بالحرج والضيق دون أية جائزة.

ويدخل الشاعر الآخر وتكرر فيه القصة السابقة و....إلخ.

حتى أثبت الخليفة فشل الشعراء جميعاً عن مدحه بقصيدة جديدة لم تقال قبل ذلك، حيث أن الشعراء لم يتسطيعوا تكذيب من كان قد مدحوه لتوهم، لكن الأصمعى القادم من الموصل وقد سمع بما حدث لشعراء بغداد والعراق يقرر الدخول فى المسابقة التى لم يجتازها أحد وقد عرف أن فى الأمر أمرا، ويكتب قصيدة ويذهب للخليفة عارضاً عليه قصيدته الجديدة، فيقول الخليفة فى مللٍ "آت ما عندك"، فيقرأ عليه الأصمعى.

*
صـــوت صفـــير البلـــبلٍ .:. هيــــج قلــــبى الثمـــلٍ
المـــاء والزهـــر معــــــاً .:. مـــع زهر لحظ المقـــلٍ
وأنـــــت يـــــا سيـــد لى .:. وسيــــدى ومـــولى لى
فكـــــم فـــــتى تيمـــــــناً .:. غــــــــزيلٍ عقيــــــقلٍ
قطفــــته مـــــن وجــــنه .:. من لثــم ورد الخـــــجلٍ
فقـــــــــال لا لا لــــلــــلا .:. وقـــد غــــدا مـــهرولٍ
فقـــــــلت لا تولـــــــولى .:. وبيـــنى اللـــؤلــــؤ لى
قــــــلت حيــــــن كـــــذا .:. أنــهض وجـد بالنقــــلٍ
وفتــية سقــوننى قهـــوة .:. كالعــــــــــــــــــسل لى
شممــتها بأنــفى أزكـــى .:. مـــــن القرنفـــــــــــلى
فى وسـط بســتان حــلى .:. بالــزهر والســـرور لى
والعــــود دنــدنـــدن لى .:. والطبل طـبطـبطــــب لى
طب طب طب طب طــب .:. طب طب طب طــــب لى
والسقـف سقـسقـسقـلى .:. والرقــص قـد طـاب إلىٍ
شـــوا شـــوا وشـاهشو .:. علــى ورق سفـــــرجلٍ
وغــــــرد القمــــــــرى .:. يصـــيح مللٍ فى مـــللى
ولـــو تـــرانى راكـــــباً .:. علـــى حمـــار أهـــــزلٍ
يمـــشى علـــى ثــــلاثةٍ .:. كمشـــــــية العرنـــــجلٍ
والنـاس ترجـم جمــــلى .:. فــى الســوقِ بالقلقــللى
والكـل كــع كــع كعــــيع .:. خلـــفى ومــن حويــللى
لكـــنى مشــيت هــــارباً .:. مـن خشـــية العقنقــــلٍ
إلـــــى لقـــــاء ملــــــكٍ .:. معـــــــــظم ٍ مبـــــــجلٍ
يأمـــر لــــى بخـــــــلعةٍ .:. حمــــراء كالــدمــدمــلٍ

أنــا النبـــيغ الألمـــــعى .:. من حى أرض الموصلى
نظـمت قطــعاً زخـــرفت .:. يعــجز عنــها الأدبــــلى
أقــول فـــى مطــــــلعها .:. صــوت صـــفير البلبلى

*

ولما سمع الخليفة هذة القصيدة أصيب بالذهول التام، إذ لم يستطع تذكر كم "لا" أو "طب" قيلت فى القصيدة، دعك من أن القافية يصعب إلقائها فى المرة الأولى، فينادى الخليفة غلامه ويسأله "أسمعت هذة القصيدة من قبل؟"، فيرد الغلام قائلاً "لا والله ما سمعت بها أبداً"، وينادى جاريته ويسألها السؤال نفسه فتجيبه بنفس إجابة الغلام فيأمر الأصمعى بأن يأتيه بما كتب عليه قصيدته، فيقول الأصمعى فى خبث وذكاء بادياً الذلة "قد ورثت عمود رخام من أبى، لا يحمله إلا سبعة رجال من الأشداء، نقشت عليه القصيدة سطراً سطراً"، فينظر الخليفة للأصمعى فى ذهول، لكنه يأمر بإحضار هذا العمود ليزنه ويعطى الأصمعى زنته ذهباً وفاءاً بوعده، قيل أن الخليفة بكى عندما رأى الرجال يحضرون عمود الرخام، وقيل أن الأصمعى قد أعفى عن مكافأته، وفى رواية أخرى قيل أنه أخذ الذهب ورد إلى كل شاعر حقه من هذا الذهب.

فؤاد حداد - المراجيحى

كل عيد وأنتم متبسمين للدنيا

******

ريحة الدنيا وأهل الزمان يا أطيب الأهل ، كلمنى منهم أبو العلا وقال لى شوف من طرف عين الشمس للبساتين الناس حبايب كلهم لابسين ، سماره ايدها فى يد ياسمين ونبوية ، ودرش قال ويايايا ياسين ، و أنا قلت ياه وياه ويا سعد وخديجة ومحسنة وأمين ، العيد يعيد وكلكم بخير ، وتفرحوا وتطيروا زى الطير ، داخلين سبق واكلين نبق شاطرين العقل قال الزينة هزينا والنزهة بتزقطط فى بحر النور والجو فوق والكيف على الطبطاب والقرش اش يركبك مرجيحة والحركة بركة.

الحركة البركه
يــا مراجيحـي
يا عْلِــوّ حْلِــوّ
يــا مراجيحـي

صابحين فاطرين لابسين أخضر
كلنــــا علــــى بعــــضنا بنــدور
لــــسه امبــــارح كنـــت منــور
بفلوسى فانوســى الوحــاويحى

يا صلاة النبي نازلــه وطالعــه
عقل وخفــه ولعـــب وصنـــعه
أنا طاير وفى ريحــي القلعــــه
أنا طاير والقلعة فـــى ريحـــى

زغروطة في قلبك مــن جــوه

تنده على اشــى تلاقيــه هـــو

والدنيا تقول لك يــا أبــو قـوه
ما احلا مجيـاتى ومراويحـــى

والهوا ع البحرى وعلى ودنه
والـــشاطر أكبـــر مـــن سـنه
والجــد يقــول اوعــى تونــوا
واش قـــد الجـــد التفـــاريحى

فؤاد حداد - حبوا الوطن

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مسحراتي منقراتي أنادى

كل الولاد في بلادي

أنادي بنتي إيناس

ألاقي خدي انباس

أنادي ابني حسن

ألاقي صدري اتحضن

عايز أهادي ولادي

بغنوة أجمل غنوة حبوا الوطن

حبوا الوطن في الغيط أبو الفدادين

وفي حصة العربي ودرس الدين

حبوا الوطن

حبوا الوطن في الجبهة والميادين

يوم الجهاد الكل مجتهدين

حبوا الوطن

وتعملوا من قبل ما تقولوا

حبوا الوطن بالحق واشقوا له

لولا العرق ما كانش نور الجبين

حبوا الوطن

حبوا الوطن في المطرح الدافي

الأم تسقيك الحنان صافي

والأب ما يحبش يشوفك حزين

حبوا الوطن

حبوا الوطن في الحي والشارع

من نور لنور والجاي والطالع

نادوا الحضور في جمعة الملايين

المشي طاب لي

والدق على طبلي

ناس كانوا قبلي

قالوا في الأمثال

"الرجل تدب مطرح ما تحب"

************

وأنا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحتة من بلدي

حتة من كبدي

: حتة من موال

حبوا الوطن

وقدموا الموال دا

من الولاد للوالده

قوموا اقطفوا لها الورده

أصل الأمل في الموده

كل العرب عيلة واحده

حبوا الوطن

اصحى يا نايم وحّد الدايم

السعىُ للصوم خيرٌ من النوم

دى ليالى سمحه نجومها سبحه

اصحى يا نايم يا نايم اصحى

وحّد الرزاق رمضان كريم

فؤاد حداد - بإيدى نقره واتنين بقلبى

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

مسحراتى

منقراتى

بإيدى نقره

واتنين بقلبى

مطلوب أجوّد

واقول وازوّد

وأنا باحوّد

يا دوب وباحبى

بإيدى نقره

واتنين بقلبى

يا مشربيّه

فى المغربيّه

سرحت بيّه

والليل سرح بى

بإيدى نقره

واتنين بقلبى

يا هلال غويتِ

الدنيا وغزيتِ

على بحر زيتى

طلعت مراكبى

بإيدى نقره

واتنين بقلبى

صبح هلالى

قمر ملالى

طلّ و ملالى

وقسم لى نايبى

بإيدى نقره

واتنين بقلبى

دقت القطايف

شفت اللطايف

خيالى طايف

فى عيون حبايبى

بإيدى نقره

واتنين بقلبى

بإيدى نقره

وبقلبى عشره

سبحانَ رَبّى

ماخافش عثره

على أرض خضرا

من غير مخاطره

والمشى طاب لى

والدق على طبلى

ناس كانوا قبلى

قالوا فى الأمثال

"الرجل تدب مطرح ماتحب"

***

وانا صنعتى مسحراتى فى البلد جوال

حبيت ودبيت كما العاشق ليالى طوال

وكل شبر وحته من بلدى

حته من كبدى

حته من موال :

سهرت ورديّتين والصبح ورديه

رجّعت للبحر ألحان المراكبيه

والزند شمر وزف الأرض والميه

من شط للتانى والعالم معديه

والقلب دقاته دقات الصنايعيه

اصحى يا نايم وحّد الدايم

السعىُ للصوم خيرٌ من النوم

دى ليالى سمحه نجومها سبحه

اصحى يا نايم يا نايم اصحى

وحّد الرزاق رمضان كريم

صلاح جاهين - يا وحوى

من قـبل رمـضان بجمـعه الهـرس دار فى الـدار

شــالوا الموبــيليا و حــطـوا العـــفش بالمــندار

بالمكــــنسه دور وبالفـــــرشه سبــــع تــــدوار

صــــبح البــــلاط زى خـــد المزمزيــــل نــاعم

والشـــقه بصّــت لهليـــتون نفـسـه بإستـــحقار

جابـــو قـــمر ديـــن وتيـــن وزبيــب وصنـــيبر

ومكـــسرات فــى شـــكارات مقـــفوله بالمـــيبر

فاضـــل فــى شعـــبان تـــلات ايـــام يا شحــيبر

راح تعــملم ايـه فـى رمــضان إبـقـوا تعالوا لنا

والكـل بــات فـى حسابــات تلخــم يهـود خــيبر

رمــضان دخـل ... كــل عام وأنتم بخـير قـالوا

مشـاوير كتـير مشـــوروا واتحــطوا واتشـالوا

عشـــان كـــنافه "ميــــدان الســت" واحتـالوا

حـــتى الــــولد لمــــا راح واتهـــربد القفــطان

اضــــطر ينــــزل معـــــاه البـــــيه يجيبهـــاله

ومن حـوارى الحسين راحوا اشتروا الطرشى

خيــار ولـفــت وبصــل ولمــون قديـم محــشى

فـوق البوفــيه رصّـوا برطماناته ولا ساعـشى

أحـــمر وبنــــى وبمـــبه وعنـــبرى واصـــفر

ويومــين يا دوبــك ده كلـه يـروح مايرجعـشى

السمــن نـازل يـرفّ... وكانـوا جايبـين كــوم

والبيــت معــــبأ بريـــحه قلّــى طـــول اليـــوم

فيشـــاوى بالليـــل ومــن بعــده النهــار نــوم

ولا شغـله ولا مشغـله غيــر بــس يــا وحـوى

والكـل فاطرين يـا عينى ولـم لـهم فى الصـوم....

إستهلال بهلال رمضانى

ليالى فى رحاب رمضان

*

كل هلال رمضان وبدر شعبان بيهلوا علينا وأنتم بخير

*

"أول ما نبدي القول نصلى ع النبي
المصطفى سيد ولد عدنان
يا حي لالي و قول بعوده الليالي
عوده الليالي ياللي كنت بتحلم

تعيش سنه يبقى اسمها رمضان"
فؤاد حداد

شاعر الصعيد الجميل ورباعياته : عبد الرحيم منصور

لا أعرف إن كان للشاعر الصعيدى عبد الرحيم منصور ديوان آخر غير ديوانه الذى وجدته بالصدفة فى مكتبة مدبولى (الرقص ع الحصى) لكننى منذ أن وقعت عينى عليه هناك تذكرت أغانيه التى تغنى بها محمد منير و أحمد منيب و نجاة الصغيرة مثل : شجر اللمون ، فى دايرة الرحلة ، حدوتة مصرية ، أنا بعشق البحر ، حاضر يا زهر.

لست أنوى الحديث عن الديوان حاليا ، فأنا لم أقرأ منه غير بضعة صفحات ، لكننى سأتحدث عن رباعياته ( الميلاد . الحب . الموت ).

الشاعر الذى نشأ فى أحضان الصعيد وسط أغانيه ومواويله تأثر كثيرا بمربعات أحمد بن عروس والغناء الشعبى الحزين فى رباعياته ، من مظاهر تأثره بمربعات أحمد بن عروس- الذى سوف أتحدث عنه لاحقا حالما يتوافر لى الوقت و المصادر- إستخدام شاعرنا نفس نظام قافية المربعات ( أ- ب- أ- ب) -أما الرباعيات فتستخدم غالبا نظام قافية (أ- أ- ب – أ)- لكن ذلك ليس كل شئ ، فقد كان أحمد بن عروس يكرر الجمل أو الفكرة فى مربعاته مثل.

الندل له طعم مالح
وله خصايل ذميمه
القرب منه فضايح
والبعد عنه غنيمه
ثم
كيف العمل فى رفاقه
الود فيهم نميمه
والقرب منهم حماقه
والبعد عنهم غنيمه
 وعلى نفس طريقه و منهاجه أتبعه عبد الرحيم منصور فى تكرار الجمل أو الأفكار مثل فى:
على كل لون الحياة
على كل لون يا بشر
بشر بتخلق حياة
و بشر بتقتل بشر
ثم
على كل لون العرق
على كل لون السنين
عرق يبيض ورق
و عرق يندى الجبين

قد يعتقد أن ذلك عيبا فى الشاعر إذا كرر جملته أو أسلوبه أو أفكاره ، لكننى أرى ذلك نوعا من الإبداع ، إذ يملك الشاعر تجاه الفكرة الواحدة أكثر من أسلوب للتعبير عنها وللجملة الواحدة أكثر من رأى وصورة فى خياله.

وهو أيضا متأثر ببعض رباعيات صلاح جاهين الذى مد الطريق لشعر الرباعيات فأكمله عبد الرحيم منصور على طريقته الخاصة.

 تجد صلاح جاهين يقول:
نظرت فى الملكوت كتير وأنشغلت
وبكل كلمة ليه ؟ وعشانيه؟ سألت
اسأل سؤال . . و الرد يرجع سؤال
وأخرج من حيرتى أشد مما دخلت
!! عجبى
 فتجد شاعرنا يقول:
عايش على دى الحال
ألف و أتعب لحالى
وكل ما أسأل سؤال

يرجع لى سؤالى تانى

وعبد الرحيم منصور متأثر بشدة بالبيئة التى عاشها وتربى ونشأ عليها وهى بيئة الصعيد ومواويله وأغانيه فظهرت فى كلماته وصوره بشكل واضح للغاية ، فتجده يتحدث عن قلوع المراكب والحنة والأوشام والأرض عطشى للرى وخيالات السفر والهجرة.

قالولى ليه يا قناوى
خطوك على السكة ساكت
أنا قلت كان لى غناوى
داقت الحقيقة و شاخت

فيه طير بيرجع لعشهّ
وطير بيفضل مسافر
وطير ماهوش لاقى قشهّ
وطير مهاجر مهاجر

لغة رباعيات عبد الرحيم منصور مترابطة مع الموروث الشعبى المصرى الملئ بالمواويل والملاحم الشعبيه ، ولذلك هى الأكثر تعمقاً فى بحار الوجدان الشعبى ، ومن الناحيه الأخرى رباعياته هى أفق إبداعى (قديم-جديد) أكثر شمولاً للحكمه الشعبيه.

فؤاد حداد - لازم تعيش المقاومة

حقيقــــة الــــدم هاجمـــــه
لازم تعــــــيش المقاومـــه

مـــن كــــل وادى لـــوادى
فـــــوق الكفــــوف زوادّى
بــــارئ مــــن الأســـــرار
وصّــــانى ليــــــل ونهــار
إمــــــــا ولاد الــــــــــديب
إمـــــــــا ولاد الـــــــــــدار
مــــا أظلـــــم التغريــــــب
عينــى بكــت مــن طيـــب
الأغنيـــه اللــــى تقــــول
آه يــا نســــيم الصـــــــبا
نــــازل علـــــى مرحبــــا
بــــين الخيـــام والعبـــــا
مـــن بعــــد آب أيلـــــول
يجــرى الشتا المستخفى
يحكـــى ربيـــع زغلـــول
يــورد أتـــر مــن زحفـى
علـــى رملهـــا المبلــول
حلـّـفـــْتــكــــمُ بالنــــعمه
لازم تعــــيش المقاومــه

شــاهد علــى مشــــهدى
مــانع يفـــيض بالكيــــل
خبـــز الغـــراره نـــــدى
أنــــوى تمــــام الليـــــل
أفــرد وأطــوى جنـاحى
علــــى قــــدم ســـلاحى
بـين المضـارب صـاحى
واعـرف ظنـون الظـلْمَه
لازم تعـــيش المقاومــه

كــان يــوم مــن الأيــام
جـدى فـى طريـق الشام
حـــــادى ولا ســــــــّلام
تــارك عــنان الهـــودج
متعــــــــوّد الأنغــــــــام
صـــوته تهــــدّج لمــــا
طلــت عــيونه لســـلمى
لازم تعـــيش المقاومــه

مـاء الدموع فى الكــون
مــــا للحبايــــب لـــــون
الله يكـــون فـى العـــون
بـــين الســنابل وقفــــت
لا تميــــل ولا تتلفــــــت
نظـرت لصـوب الشــرق
مـن جفنهـا اللـى انشــق
طالبــه الــوطن والــحق
دايـــم شـــقاها ودايمـــه
لازم تعـــيش المقاومـــه

ذكــرت يافـــا وأريحــــه
وفـــى الخيـــال عــــدّيت
والقـدس أختى الجريحـه
لمــــا بَــــدَت غضــــيت
تحــت اللغــط والــدهس
أنّـــت أنـــين الــــــنفس
درج البيـــوت النايمـــه
لازم تعــيش المقاومـــه

حيفـــــــــــــــا ورام الله
ومــن الجـــليل عليــــاه
لا تعيــــــد علــــــىَّ الآه
عـــادت علـــىَّ ســــنين
هـــــــذا أوان التـــــــين
لعـــب التـــراب بـــالنور
رجـع الصــدى المبــهور
بـين الزيتــون والكرمــه
لازم تعـــيش المقاومـــه

الطيبـــات فـــى الحقــــل
بكريّـــــــة الأحضـــــــان
وكتـــاب يبـــرّ العقــــل
يامـا ســقيت الحيضـــان
وشـكرت فضـل الغيطـان
كرامـــــــه الأوطــــــــان
أنــا ابنــى يكبـــر عنّـــى
حمــد ومــوده ورحمـــه
لازم تعـــيش المقاومـــه

فــى الأمنيــــه والأمــــل
فــى الشــارع المفتـــوح
فــى الشــارع اللى انقفل
وبـين رصـيف وسـطوح
وبـين كراســى وموائـــد
وفى الاحتـرام والحُـــــبّ
علـــى إيــــدين الوالـــــد
فــى الماء نبـع ويصُـــب
وفى حضـــور الصــــبح
وفى إجتمـــــاع القمـــــه
لازم تعــــيش المقاومــه

الإنســـــــانيه كرامــــــه
والطيبـــــه والأخـــــلاق
مــــايقبلوش الملامـــــه
مجـروح كـأن السلامــه
إهانـــــــه للشـــــــهداء

ديوان "استشهاد جمال عبد الناصر " للشاعر فؤاد حداد - الجزء الثانى من الأعمال الكاملة للشاعر فؤاد حداد - لازم تعيش المقاومه

سيد حجاب - شوك .. وضل

.. أحب ما عليا

الشجره أم شوك و ضل !
الضل وحده يتلج الحشا .. يعلّ
والشوك يـِغلّ

...........

ما احبش القديسة
ولا اللى ما يعرف خلاف سجاده الصلا
براءه الملايكة ف ارض شايكة .. شئ يشل
و ما احبش الخسية
ولا الفلاتى الزانى حتى ويا أحجار الفلا
خساسه النجاسه والنخاسه والسياسه و قلة الحساسة
شئ يذل
.. و أحب ما عليا
الشجره أم شوك و ضل

1966

ديوان " مختارات من شعر سيد حجاب " – مكتبة الأسرة 2005

فؤاد قاعود - الصدمة

لو نزلت المحروسة ملفوفة القوام
أم العيون بنفسجى
من قصرها العالى و شاورت لى
لوحدى من دون الأنام
حأغض بصرى
و مش حرد السلام
علشان أنا من سنة
نفضت إيدى من الغرام

*

لو دندن البلبل بصوته الرخيم
و ضم عودته تحت جناحاته
و كنت أنا وحدى النديم
حأقفل ودانى فى وش أنغامه
و أهيل عليه التراب
علشان أنا من سنة
شفت الغنا كداب

*

لو أصطفانى المضحك المشهور
بلبعه و أتشقلب قصادى
حيطل من عينى الغضب
و مستحيل أبتسم
مهما المهرج هاص و زاط
علشان أنا من سنة
عرفت إن الضحك إبن العياط

*

لو خصنى الفيلسوف
بحكمته المحفورة فى ذهن الزمن
و بدأ يوجه لى الحديث
حأخد طريق غير طريقه
و أمشى بعيد عن ندوته و الزحام
علشان أنا من سنة
مؤمن بلا جدوى الكلام

*

لو أتحشى فرشى بريش نعام
و لو ستارة غرفتى
مطرزينها بأجمل الأحلام
محال أغمض عيونى
مهما يزيد لومى
علشان أنا من سنة
ضيعنى نومى

*

لو النجوم تنزل و تمشى فى الشوارع
و لو العمارات تطير
و لو الضفادع فى الشتا عرقت
و الجو فى أغسطس أصبح مطير
و لو الحمير أتكلمت بفصاحة
و النملة صبحت فى ضخامة الفيل
مش حأندهش
بعد اللى فات
علشان أنا من سنة
إحساسى بالدهشة مات

الخامس من يونيو 1968

الأعمال الكاملة للشاعر فؤاد قاعود - دار الأحمدى للنشر

وصية عمر نجم

إبنى اللى لسه مجاش
بيرسمك وردة
هى السنين ببلاش
و الا مفيش فايدة ؟
!جاوبنى يا بكرة
عمر نجم – إبنى

*

و إن دمى مرة سال
على الطين حاكون موالى
أوشوشه ف قلبه
يضمنى ف حضنه
شاله يغطينى
أوصيه على إبنى
فى قلب جوف جوفه
أمانة يا طينى
تنزع عروق خوفه
و أزرع شرايينه
زيتون فلسطينى

نوفمبر 1992

ديوان الشاعر عمر نجم – غياب الحضور ، و حضور الغياب- مكتبة الأسرة

حواديت مجدى نجيب

ياما في زمانّا قلوب
راسماها أعمارنا
زي النجوم حواديت
على ضلّ شبّاكنا
دي مركبي فضّه
وفرحي لو قضّى
حبيبي يبقى معاي
مش غيرُه مش ح أرضى

ساعات أتوه مرّات
ألقى القمر هدَّى
يسقي النسيم شربات
في ليل طويل عدَّى
الصعب راح .. ولَّى
والحب دا أحلى
لو وقفت الساعات
صوتي أكيد أعلى

لو زارني فرحي ساعات
حواديتي ما بتخلص
قمري حصان في الليل
ونجومه دي بترقص
والحلم ويايا
والذكرى جوايا
من بين كتير حكايات
حكايتنا دي أحلى

ساعات أحبّ حاجات
ما يحبّهاش غيري
في الرايحه في الجايّات
باغنّي مع طيري
طمّني .. أتطمّن
في القلب راح أسكن
وطول هواكي معاي
بتدفّا وأتطمّن

الأرض بتتكلم عربى و كذلك الشعراء

لأن فكرة سيف خشب تدين فى الأساس بكلتا المدونتين الأرض بتتكلم عربى و شعراء ، فمن المؤكد أننى أسعد لعودتهما ، ليصبح سيف الشعر أصلب و أكثر بريقاً

*

عودة

شعراء

و

الأرض بتتكلم عربى

بقصائد جديدة

نهاركم سعيد

صلاح جاهين - الشارع

 الشارع قال للحارة:

إخييه....

ريحتك طعميه ، وفول وبصارة..

آييياه...

كل بيوتك بغدادلى

مافيهاش تكييف

وبيبانك نازلة لتحت ، بدل ماهى طالعة لفوق ،

ولا حتى ليكى رصيف

وستاتك بلدى، وليل ونهار ع العتبة

.قاعدين كده جوق..

رجالتك نكته وعجبه

ولا يعرفوا ذوق

وعيالك دول

نسانيس مقاصيف الرقبة

.............................

الحارة ردت رد...

خلى الشارع ينسد! 

*الأعمال الكاملة لصلاح جاهين -الجزء الثالث - أزجال صحفية -مركز الأهرام للترجمة و النشر

أحمد فؤاد نجم - عيون الكلام

إذا الشمس غرقت

فى بحر الغمام

و مدت على الدنيا موجة ظلام

و مات البصر

فى العيون و البصاير

و غاب الطريق

فى الخطوط و الدواير

ياساير ياداير

يا بو المفهومية

مفيش لك دليل

غير عيون الكلام

سجن القناطر 1970

أحمد فؤاد نجم - الأعمال الشعرية الكاملة - دار ميريت

فؤاد حداد - الأمل

أثناء انطلاق صفير الغارات فى الشوارع وانفتاح سماء مصر أمام الطائرات الأسرائيلية بعد نكسة 1967 كان هدير المطابع المصرية لا يتوقف معلنا مولد طبعة جديدة من ديوان الشاعر فؤاد حداد "بقوة الفلاحين و بقوة العمال" يضم مجموعة قصائد جديدة اسماها الشاعر "لابد من يولية" تتضمن قصيدة صغيرة، "الأمل"، و هى آخر قصائد الديوان.
لا أعلم متى كتبت هذه القصيدة تحديداً – هل قبل النكسة أم بعدها ؟- لكن على أيه حال بصدور الديوان فى سنة 1968 نفى فؤاد حداد للشعب المصرى وفاة روح ثورة 1952 بعد النكسة وإنما تعطلها فقط لحين تحرير الأرض المصرية، أعلن رفضه التام لليأس والأستسلام كما رفضها الشعب المصرى فى 9 و10 من يونيه. ونشرت القصيدة للمرة الثانية فى ديوان "الحمل الفلسطينى" بعد ذلك.
القصيدة وباقى قصائد الديوان ومجموعة من دواوين فؤاد حداد صدرت فى الجزء الثانى من الأعمال الكاملة لفؤاد حداد.

*

حَ يكون يوم زى تلاته وعشرين
من شهر يوليه
تموز
حَ يكون يوم زى الفاتح
من شهر زى نوفمبر
والدنيا كل الدنيا حَ تكبر
فى صف واحد من تمام الصلاة
أستغفر الله
فى ايدين العدو المسجون
مسرى النبى وجبل الزيتون
حَ يكون
يوم فى تاريخ أكبر من الحرية
أكبر من الحرية

*

يا دمعة العين ما تخافيش تجرى
لابد منك فى الحماس الحق
الدنيا صيف والجو مش أخضر
والموت ما هوش فى صفحة الوفيات
ولابد من اتنين
الجوع وناكل
العطش ونشرب
الحياة والموت
الهزيمة وننتصر
الصبر
لكن ما فيش صبر فى الدنيا يقدر
وإن كنت عمرى ميت سنه
وإن كنت ميت الف لاجئ
ما فيش صبر فى الدنيا يقدر
يفطمنى عن وطنى

يا لاجئين طالعين على الضفه
متغربين مستغربين باصين
بعيون طويله زى نور الشمعه
بوجوه شاميه زى والدى صغير
بإيدين بطيئه من الطبق للفم
حَ يكون يوم و حَ يكون أم للأيام

*

يوم فى التاريخ أكبر من الحرية
أكبر من الحرية والبترول
الدم والبترول
الساعة والزلزال
فى كل شبر هلال
بس نمشى
والأرض بالنبض اللى قال بورسعيد
تعرف تقول وتعيد
والأمل وجدوره مليون شهيد
ما يتقلعشى
ويا صبر ليل
الفجر فى الفجر يدن

أمين حداد - فى الموت حنعيش

أنا زعلان جداً جداً علشانك

يا ميت فى أوانك
قبل أدان الديك
أنا زعلان جداً جداً علشانى
مش راح أشوفك تانى
يا أعز صديق
والناس فى الشارع ماشية
وماهيش شايفة البنت الحافية
وبتبكى ورا الشبابيك
ومحمد بيعيط زيك
كان قاعد يكتب نعيك
ابن فلان و فلانة
وجوز علانة
وأبو أبصر مين
وقريب و نسيب عائلات
أسماء عناوين
وابنك واقف ياخد عزا والده
والجرسون اللى بيعمل قهوة
عرقه مصفر ياقته
كله بياخد وقته
وأنت ماخدش وقت
قررت تموت
وقت ما أموت بالضبط
أنا وأنت صحاب و حبايب
من وقت الشِعر الخايب
ولحد الشَعر الشايب
من وقت الأوتوبيس اللى معدى و بيسلم
على أجزخانات و قهاوى و حنفية ميه
وبتوع فخار، ومصاطب وأزيار
وصعايدة بيبعوا خيار
وكلوبات سهرانة
ولحد ما رحنا الجامعة
والكشاكيل فى الأيد عرقانة
من وقت مصايف رأس البر وجمصة
والسهرة مع الطاولة هزار
ولحد ماشفنا ولادنا كبار
مش عارف أقولك حاجة
لكن أوعى تموت بسذاجة
احنا صحاب و حبايب
حنسيب الأرض
ولحد ما نوصل لسمانا
نمسك إيد بعض
ونودع قرآن معزانا
ونقول للناس الحزنانة
يمكن فى الموت .... حنعيش

*أمين حداد - ديوان فى الموت حنعيش - دار ميريت*

بيرم التونسى - يا هل السودان يا عرب

ياهل السودان يا عرب! يا مسلمين الله

بينا وبينكم نسب، كل الأمم عرفاه

لأنتم نسيتوه و لا إحنا للأبد ننساه

والنهر بينا و بينكم، ربنا أجراه

واللى شرب من دمكم، من دمنا رويناه

واللى ركب ضهركم، فوق ضهرنا هواه

واللى وعدكم وعدنا، بالنعيم والجاه

وإدحنا و أنتم عرايا محتاجين لغطاه

لو كنا ننسى قرابتنا، ونجرى وراه

حاينفرط شملنا، ونقول يا ندماه

ديوان المجموعة الكاملة لشاعر الشعب " بيرم التونسى " - مكتبة مصر

البداية

"الكأس معلقة فى كف الوردة
والبلبل وصاف الخمرة
يشدو بلغات لا تحصى
فتأبط دفتر أشعارك
وارحل نحو الصحراء"
الشيرازى