السبت، يوليو ٢١، ٢٠١٢

فؤاد حداد - أحدٌ أحد

يا أهل الأمانة والندى والشوق يا مجمعين الشمل فى الحضره الزكيه أوّل ما نبدى القول نصلى على النبى
المصطفى سيّد ولد عدنان
قلنا النبى عربى النبى إنسان
وقلنا سبحان الذى أسمانا
ردّتّ جهات لا تنتهى سُبحَانًه
سألنا بحر غميق ودنيا براح
من أى قرية بلالّ بن رباح
حطت حمامة مرفرفة بالنور
دخل الصباح فى الليل حلم بالصباح
باحكى حكاية كبيرة معروفه
عن ناس ما حدَش فيها بيعرف حدَ
بالرحمة تصبح دنيا مألوفه
وفجر يتنهّد ظلام ينهدّ
كان يا ما كان يا مجاورين الآذان
ع الغصن بلبل من ولد آدم
من طينة الأرض اللى زارعه النيل
نوّارة الصبر اللى طارحه النخيل
يثبت ويمتد ويقع ويشيل
ربطوه بحبل و قربوه من موته
ربطوا معادن كل قلب ومركب
ولآخر الدنيا العطاشى بصوته
ربطوا الضحى والعصر والمغرب
أَحَدٌ أَحَد طلعت جبال مكه
نزلت واديها شعشعت فى الشعاب
بلال مطر بنهار وليل وسحاب
وبرق أسرع من سؤاله الجواب
أَحَدٌ أَحَد سكك الشباب مطروقه
دايسين عليها زى لحد قديم
رفعت راسى مش حاوطّيها
قسماً برب العرش و العزّه
والناس ما عدتش تانى أكسرها
أَحَدٌ أَحَد مزروع أنا مزروع
أستغفر الله ان أصابنى المرح
سمعتهم قالوا ما بيحسَش
أستغفر الله ان أصابنى الغرور
ان كنت شايـف نفسى
دا جسمى شايف عذابه
دا كل رمش يحس بشقايا
دى كل نظره شاهِدَه معايا
أَحَدٌ أَحَد

أَحَدٌ أَحَد
أَحَدٌ أَحَد
هم ميتون
و اللهُ حىّ
أَحَدٌ أَحَد
إنّى أحسُ
فى كل فودِ
عرقاً اليماً
يقيمُ أودى
إنّى أرانى
عبداً و حراً
و الناسَ طرّاً
بينى و بينى
و الأُفُقُ ليسَ
يغولَ عينى
يا هولَ صَيحَه
يومَ القيامة
ليسوا نياما

هم ميتون
و اللهُ حىّ
أَحَدٌ أَحَد
أَحَدٌ أَحَد
يا هَوّلَ صَيحَه
تردَّدت
فبدَّدت
حُجُبِ الظلام
لمّا بَدَت
هذا كلامى
ماضٍ أمامى
كل المضاء
مثل القضاء
ضوء أضاء
على مرامى
ضجّ الفضاء
وُجِدت عيون
هم ميتون
و اللهُ حىّ
أَحَدٌ أَحَد

أمَا الذى إسمه أُمَيَّةُ بنُ خَلَف
إسمه يقول لك إيه يا راوى الخبر
الخير إذا بقّع بيبقى كريه
إيش حال بقى الشرّ اللى بيبقّع
جبان لأنه مدّعى و ظالم
و غنى و بخيل و جبان لأنه جبان
يحدف رقيته زىّ حدّايه
يلفّ ما يلّفش دنى و عجبان
يعمل كأّنه لمّا يمشى بيكبر
و لما بيمسك لحيته بيدبّر
شئون جليله فى مقام أبو جهل
أبو جهل كان بيبص لابن خلف
حدايه طايره لظلها اللى زحف
ما لهش حتى فى الجهاله شرف
هوَّ اللى جاب الصخره زى الرحايه
علشان يعذب فى الظهيره بلال
ينقلها له فى الرمضاء على صدره
يقول يكفر بالذى أرسل مُحَمَّد
ما خبرش لسه فى يمينه المهنّد
بلال كأنه اتولد يَتشَهَّد
بلال فى أعلى الدوح فى أعلى الدوح
عيونه تتفصّل عليها المناظر
و صوته بيكسّر حدود السلاسل

أَحَدٌ أَحَد
أَحَدٌ أَحَد
هم ميتون
و اللهُ حىّ
أَحَدٌ أَحَد
يا ربّ فارحم
هذا الجَسَد
قد اجتهدتُ
كما اجتهد
و قد جثمتُ
و كان صمتُ
و كان صوتُ
و كان أنّى
الذى انتصرتُ
فى الرضعتينِ
قلبى و عينى
دنيا و أخرى
جاهاً و سخره
حقاً و نيّه
أمّا الدنّيه
فلن تكون
هم ميتون
و اللهُ حىّ
أَحَدٌ أَحَد
هل كان يحلو
لو كل شئ
فى الأرض سهلُ
شممتُ شمساً
سأستعيدُ
و أستجيدُ
عصارتيها
تحت الظلال
ما كان تيها
و لا ضلال
لقد رشدتُ
فيما نشدتُ
و ما احتشدتُ
و اسمى بلال
مثل الهلال
فوق الظنون
هم ميتون
و اللهُ حىّ
أَحَدٌ أَحَد
أَحَدٌ أَحَد

يا ليل يا ليل يا اللى شجانى هلاله
بلال و صوته و الاّ صوت و بلاله
الأسمر الشمسى هديل النور
عطشه اللى بيريّح هطول المطر
و يعطّره و يطّيبه و يسقيه
بلال بلال الماء أموت دلوقتى
والا أعيش سبعين سنه و ثمانين
الجنّه جنبى لما اقول الله
أَحَدٌ أَحَد و لا يسمعوا لى أنين
إن عذبونى فى الحجاز قادر
أعرف روايحها الحجازيه
وطن مُحَمَّد ابتسامته جميله
أنا طفل ياجرى تحتها فرحان
و شاب باتعذب بجرأة و ثبات


أَحَدٌ أَحَد
أَحَدٌ أَحَد
هم ميتون
و اللهُ حىّ
أَحَدٌ أَحَد
يا هول صيحه
تفنى الغدا
قولوا بلالٌ
تشهّدَا
و راح يهدى
كما اهتدى
مادَ المدى
أراح ظهره
وَ أَسنَدَه
الى جدارٍ
من الندى
لقد أحبَّ
مُحَمَّدا
الله أكبر
الله حى
أَحَدٌ أَحَد
أَحَدٌ أَحَد

يا اهل الأمانه و الندى و الشوق
قلنا بلال عارف بألف دليل
حريته تحت ابتسام النبى
و جنته فى مكان بين الصحابه
و حديث شريف مسموع فى أسد الغابه
ان النبى ما دخلش مَره الجنّه
إلا و حس بلال بيستقبله
حى العرب يا مجاورين الآذان
صلى الإلهُ على الرسولِ و سلَم
(صلوا عليه و سلموا تسليما)

من الأعمال الكاملة لفؤاد حداد المجلد الرابع - ديوان الحضرة الزكية - الهيئة العامة لقصور الثقافة

السبت، أبريل ٢١، ٢٠١٢

تميم البرغوثي .. يا شعب مصر


يا شعب مصر اللى سابقه ضحكته غضبه 

 ما يطلع الصبح إلا وصحبتك سببه
 يا مخلص الأرض من وحشتها فى الأكوان
 يا حجة الشمس تفضل طالعة ساعة كمان
 مستأذنة وهى مش عادتها الاستئذان
 متونسة بالميدان وبعشرته ونسبه

 ما يطلع الصبح إلا وصحبتك سببه
 يا مخلص الأرض من وحشتها فى الأكوان
 يا حجة الشمس تفضل طالعة ساعة كمان
 مستأذنة وهى مش عادتها الاستئذان
 متونسة بالميدان وبعشرته ونسبه


يا شعب يا مصلى قدام العساكر صف
 يجرى الجريح من ورا لقدام لا خاف ولا خف
 تدوس عليه العربية تحوله لميت ألف
ياللعجب يقتلوه ويتوقعوا هربه
 ياللعجب يقتلوه ويتوقعوا غيابه
 اللى اتقتل لسه واقف هو وأصحابه
 ما بهدل الأمن غير من ماتوا واتصابوا
 والصبح ما نور إلا أّمّا الشموس غربوا


اضرب عليا أنا مش جارى يا قناص
 من امتى خوفنا يا ابن الكلب ضرب رصاص
 كل اللى شاف الشهيد بقى تاره تاره الخاص
 الدم صاحى وعنيد ولا تقبلوش تربه


يا شعب ياللى دفع تمن الشوارع دم
 احفظ أسامى اللى ماتوا فى الشوارع صم
 الشارع اللى اصطفى وقصر الاماره لم
 ملوك قليلة الرباية ركبوا واتركبوا


شعب بغزالة اتخنق قلب التاريخ فى يومين
 لابس عباية جحا وهو صلاح الدين
 بيكرم الأنبيا ويهزأ السلاطين
 والفجر خيله وحبات الرمال عربه


يا شعب مصر أكم فرعون وفرعونة
 ضربتهم ضرب سجادة فى بلكونة
 ضرب الملوك تربية صالحة ومضمونة
 ما يبقوا بنى آدمين إلا إذا انضربوا


ضرب الملوك مصلحة ، ضرب الملوك تأديب
 ما أحلى المماليك وهى بتجرى فى السراديب
 ولولا ضرب شجرة الدر بالقباقيب
 ما بين أغا وباش أغا كانوا التتار غلبوا


بعدين مبارك فاروق سادات محدش دام
 هو احنا شعب كده مبيعشلناش حكام
 عقبال جيرانا وحبايبنا كمان يا سلام
 لو كل من له رئيس نصحى نلاقيه قلبه


يا مصر لسه ولسه الثورة بلة ريق
 ما ينتهى لك طريق إلا ويبدا طريق
 يا شعب مصر تعالى نتفق يا شقيق
 رج الملك قبل ما تنعم عليه بلقبه
رجه كده شوفه إن كان شغال
 واسأل عليه المكوجى واسأل عليه البقال
 أهم حاجة فى صفاته إنه يكون يتشال
 متربى عال لما يمشى يلتزم أدبه


بتكون فى أحسن حالاتك لما تبقى مش محكوم
 بتبقى رايق ولا ظالم ولا مظلوم
 بعدين ده غبى ايه ده اللى يهددك بالشوم
 يا مخلى ألف احتلال ينزل على ركبه


يا شعب انت اللى كارم كل من حكمك
 الدوله دى عارفه تحكم بس من كرمك
 كشرلها وهى تيجى تبوس قدمك
 مفيش حاجة اسمها مليون راجل اتغصبوا


سايق عليك النبى ما تقول كفاية يا شيخ
 الملحمة أما تخلص يبدأ التاريخ
 وبكره جايه حروب فيها بكا وصريخ
 وبكره نصرك يخض الشمس من لهبه


سايق عليك النبى ما تقول كفايه كده
 من النهارده انتصاراتك هتبقى كده
 يا شعب مصر اللى رجالته وبناته كده
 حلال عليه لبن العصفورة لو طلبه


سايق عليك النبى ما تقول كده كفايه
 افرح وكمل ومتقولش كده كفايه
 الثورة دى بداية زى الهجرة والميلاد
 الثورة دى بسملة ... كمل بقى الآية
 مع كل مرة قراية حسنها يزداد
 والآية تجرى تسلم أختها الراية
 من غير نهاية وحتى الوقف مش معتاد
 وبكره أيامنا تبقى حكاية ورواية
 عن ناس يباتوا حفايا يصبحوا أسياد !



خمسة وعشرين يناير يا شباب حصل ايه ؟
 لو قلنا يعنى على الساعه 3 الفجر
 كان حد فينا طول أو جد حاجة عليه
 أو جاب سلاح أو ملايكه بشروه بالنصر 
 كان اختلف فينا إيه عن أى يوم قبليه؟!
نمنا غلابة، صحينا احنا ولاة الأمر
كان عرش مصر ف أوضنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين فى إدينا شايلينه


بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه


وشعب مين اللى كانوا الظبط حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هدية وهداية

لو كانت الأنبيا ع المية مشّاية
لأجلك يا مصر مشينا باسمين ع الجمر
يا مصر وافتكرى أصل الدنيا نسّايه
الملك ده حقنا ومفيش فراعنة جداد


افرح وكمل وما تقولشى كده كفاية
الثورة ده بداية زى الهجرة والميلاد
مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان
فيه حاجة ف طبيعة البشر
زى السمع زى البصر
زى اكتشاف القدرة ع الطيران
فيه حاجة كانت ضايعة وبانت
خلت الأمة استعانت
عالشقا بالله وهانت
هذه الدنيا على الفتيان
ارقينا وارقيهم يا عم الشيخ


فى حاجة خلت يشمك التاريخ
ينزل عن الوجه الجميل فيبان
فى حاجة أصلا فى الطبيعة 
تدعو للثورة على السلطان


شوف الشجر رغم الحجر 
طارح ثمر زى الخبر وبتعلنه الأغصان
شوف الهوا حب اللِّوا
فبقوا سوا هبَّة لها ألوان
شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره
تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران


شوف النجوم ما لهاش نظام حاكم
تكسّر كلمة العالم
يبص ويبقى مش فاهم
وهو شايفها ماشية بكيفها فى الأكوان


فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان


فيه حاجة بتخلى السجين المستكين
فى كل حين أشطر من السجان
فيه حاجة بتخلى القوى عيِّل أوى
وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق 
من غير قصد مابترجعش لو طلعت


وم الأسمنت والأسفلت .. يفلت فلت .. نهر مقدس الجريان
فليحذر السلطانُ زحف الغابة
والورد إذ يستأنس الدبابة
داب الحديد من لمسته دوبان


فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان


وإذا بهذا الفجر يا إخواننا اتولد بيننا
وكنا احنا بنستنى وهو كمان بيستنا
وأتاريه بس عايز إذن منا وهو فى يميننا
فلما أذنا خد منا وعطانا أمان


يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
اديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان



يا مصر و انتى لسه فى البدايات
بكرة اللى جاى أعظم من اللى فات
يا مصر قومى و بصى فى المرايات


كان كل واحد فى الميدان جايب معاه مراية
رافعها للسما
أشكال و ألوان كلها مرفوعة فى العالى
صبحت مراية واحدة بتلالى
و بقت يا مصر الأرض صورة للسما
لعبة بازل متكاثرة الأجزاء
لما البشر يتجمعوا تبان السما عالأرض
و لما البشر يتفرقوا تلقى السما بتنفض


تبقى السما متوزعة جوة الشقق
و تمر ليلة من التوجس و القلق
و ننام و نصحى تانى يوم ترجع سم
ا لما البشر يتجمعوا مع بعض



يا مصر حقك تملكى بدل السما اتنين
واحدة هدية و واحدة تانية صانعها مصريين
يا مصر لو دققتى هتلاقى البراق
بيجر عربية فواكه فى الحوارى الضيقة


شوفى الصحابة و الحواريين على القهوة بيتناقشوا بحرارة
و السما على مد ايدهم مستشارة طيعة و رقيقة
شوفى المساجد كانت تشاور عالسما
صبحت تشاور عالبشر


و تقول اهما يا سما بصى و شوفى
و ابقى قولى لكل صوفى و هو طالعلك
طريق المعرفة اتغير
يوصل م السما للأرض
لا يتوه و لا يحير


و شوفى الخلق وسط الموت تقابله و هى بتهزر
فيتلخبط و يتبعتر و سر الدنيا يتفسر
و نعدلها و نوزنها


بقول يا مصر قومى و بصى فى المرايات
فى سما الولاد هما اللى عاملينها
بيشوفوا بعض فى وش بعض
كأنى أنا انت و هو أنا و احنا الكل
احنا فى مرايا بعض بنصبح صباح الفل
أفدى بروحى كل واحد فى المرايا طل
أفدى الشهيد اللى بيتبسم
الفجر توب على قده متجسم
و الله أعلم مين من الاتنين فى صاحبه حل


أفدى اللى سهران على الخيم فى الطل
و أفدى اللى واقف يشتغل فى الظل
و أفدى اللى شايل للعناد إشارات
يهدى التاريخ صوب الميدان لو ضل


و أفدى اللى واقف هارى نفسه كلام
و أفدى اللى يتتريق على الحكام
و أفدى اللى رايح جاى ما بيتعبش
و أفدى اللى جنبه حط فرشة و نام
و أفدى طويل البال ما يتعصبش
و أفدى المصاب اللى شوية و طاب
و أفدى المصاب بهوى التراب و ما طابش
و أفدى اللى صاب البلطجى و ما اتصابش
و أفدى المقام العالى فى التحرير
دولة بلا أمرا و شعب امير



  
اعلم يا هذا الجيل إن الوطن بشره
لو مصر من غير نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا


والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره


ناس لسه فى العشرين نازلين على الميادين
بيهزأوا السلاطين من غير ما يعتذروا
يا شعب يا مجنون .. علم شعوب الكون
اللى اخترع فرعون .. قادر يجيب خبره


يا سادة الأيام .. يا رافعين الهام
من بكرة بر الشام .. نادر لكم شجره
نادرها تين وزيتون .. فى القدس ينتظرون
جيش ع الغلابة حنون .. وعلى العدا ضرره



دافعين تمنها دما
يا أمة الكرما
شعبك كأنه سما
و الدنيا دى مطره


يا مصر حمد الله عالسلامة
مطر و نازل بدون غمامة
مطر يا سيدى نازل و طالع
كأنه مدنة و الأرض جامع
و الأرض دى مظاهرة فى الشوارع
تسقى السما جدعنة و شهامة
مطر طالع يقول لربه
الأمهات اللى فى مصر ربوا
و يا بنات مصر قوموا حبوا
أجمل ما فى الراجل الكرامة


مطر و طالع عالفجر يدن
طلعت بنات مصر حلوة جدا
فى الحرب و الدنيا نار و معدن
طايرة و شايلة السما اليمامة


 خمسة وعشرين من شهر واحد
ألفين و عشرة و زادوا واحد
كنا ملايين و كنا واحد
حددنا موعد يوم القيامة




قلت لصحابى انزلوا وأنا بعيد عنهم
وقلت من بات فى بيته سلم اصحابه
وأنا اللى غبت وهما اللى هنا اتصابوا


نزلوا الشباب الميدان وأنا بعيد عنهم
كسروا الشباب البيبان وأنا بعيد عنهم
خرج الشباب م البيوت وأنا بعيد عنهم
دخل الشباب فى الموت وأنا بعيد عنهم


يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم


يا موت تعالى أعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وأنا بعيد عنهم





أصل الحكومة قالتلى انت مش مصرى
انت فلسطينى يعنى أجنبى حصرى
طيب يا بيه يعنى بلاد الشام بلاد أروام
أعيد كلام قلته 100 مرة ده يبقى كلام!؟


مش أم هاشم بلدها السيدة زينب
مش الحسين فى الحسين و اللا لازمله جواز ؟
و ألا هيختار ما بين مصر و عراق و حجاز؟
 و المرسى و الشاطبى جم م الاندلس الاتنين
من مرسية و شاطبة إن كانوا مش باينين


فى اسكندرية أجانب و لاّ مصريين ؟
أسمائنا هى بلادنا يا حسن و حسين
أسمائنا زى العلم زى اللغة و الدين
أسمائنا هى الوطن له دمنا لو عاز


و اسمى خلالى فى الأرض العريضة ملاذ
و عزوة فى كل دار تنطق حروفه تمام
و فى كل دار ليا صحبة و ليا أهل عزاز
 كان نفسى يا مصر يتأكد كلامى بدم
و الدم يا مصر برضه عالمحبة قليل


قالولى بتحب مصر قلت مش عارف
هو الهوا يبقى جارف لما أقول جارف ؟
و اقعد أألف أغانى عن جمال النيل
و حكاية الشرب ميت مرة و هرم و نخيل
و الّا الهوا الحق هو اللى يهد الحيل


و اولى شىء فى الهوا يا مصر شيل الهم
ياللى تحب النبى ايدك معانا وشيل
الحب اتقل من اسمه و اسمه نفسه تقيل
و فى التباس المحبة عالمحبة دليل


ما تعرف اللى اصابك عشق و لّا تعب
و الشوق بيقلب مع الحرمان ساعات بغضب
و الصبر بس أما يخلص
بيبقى صبر جميل





يا أهل مصر
و أنا أهلى فى مصر عرب
أهلى عزازمة و عشايرة
الخال و خال الخال
ما بين شراقوة و صعايدة
بدو فى الحالتين
قولولى دول عرب أو دولا مصريين
أو دولا الاتنين سوا فى الحل و الترحال


بعدين أنا اسمى تميم
و هروح من اسمى فين
مش فيه فى مصر قريش ؟
قالوا البراغتة قريش
من بيت عدى بن مرة
و النسب عُمَرى


حطوا الحدود و العشيرة واحدة فى البلدين
و سلك شائك فرق من قالوا ليه او ليش
و كنت اطنش لو ان البحث ده نظرى
لكن ده فيه دم سال


و اسأل رفح و عريش
و اسأل ملوك ترهن الأقصى برغيف العيش
و اسأل حدود تحرم المسلم من الحرمين
و اسال فى غزة الوف فى الحرب متحاصرين


و يخيرونى العيال فى حب أب و أم
أنا ابن رضوى و مريد
اسمى تميم من تمّ
و كل دار فى العرب ليا فيها خال أو عم
و اللى يقول غير كده بينى و بينه الدم
مين اللى يثبت و مين اللى يجرى

  

شد الكلام عمته و اختار أعز جواد
و رد قاصد بلاده و الهوى رداد
و ابن الاصول اللى ما يبدل بلاد ببلاد
و الغربة مرة و لو كانت هدومها جداد


فى مصر بعد السفر وجد الكلام معناه
و أهل مصر صحابى و أولياء الله
يا أوليا لسه فى العشرين و فى التلاتين
يستنجدوا المؤمنين فى المأزمة بيكم


يا فارجين الكرب بين العرب عناوين
منعنى عنهم مطار القاهرة و اسمى
و إنى لو جيت يقولوا أجنبى مسكناه
مسكنا واحد اهو له مديح فى حزب الله
يتهموا أصحابى بيا مش أنا بيهم
و أضُرلى ستة سبعة أكون فى وسطيهم


عبال ما خلص الكلام ده
النصر كان مضمون
القلب فرحان و لكن أتعبه منفاه
و هده بعده عن اللى عاش بيستناه
ما فضلش غير إنى انحنى حبا و أقول ... الله
الله أفردنى عنهم و جمّعهم
لكى أراهم على بعد و أسمعهم
قد فاز فوزا عظيما من قضى معهم

  

لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل


اللقمة دى لك نصيب فيها باشيلهولك
وأشيل نصيبك من القعدة وكاسات الشاى
 لكن نصيبك فى أنفاسى أشيله إزاي ؟
وازاى أشيللك نصيبك من فرحنا الجاي ؟


ساعات ألاقينى بطلب خط محمولك
بعمل فى نفسى كده ليه ؟؟ ، لسه مش عارف
و أروح على القهوة أسأل، هو جه وسأل


من قال لك الموت طبيعى يبقى مش شايف
الموت ده شىء مش طبيعى
الموت ده أصله خلل
الأصل فينا الخلود
وهييجى يوم نلقاه


ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
 موت معاه بشرية كاملة محتملة
عِدّوا كان فيها كام شاعر وكام رسام
وكام طبيب عبقرى بين الأطبا إمام
وفيلسوف له على حكم الليالى كلام
وبنت نظرتها تشفى القلب من داؤه


فى شعب كامل رحل ما عرفش أسماؤه
في جسم كل شهيد فيه مصر مكتملة
فخلوا مصر اللى فاضلة تعيش كما شاؤوا


تميم البرغوثي ديوان يا مصر هانت و بانت .. دار الشروق