أنا زعلان جداً جداً علشانك
يا ميت فى أوانك
قبل أدان الديك
أنا زعلان جداً جداً علشانى
مش راح أشوفك تانى
يا أعز صديق
والناس فى الشارع ماشية
وماهيش شايفة البنت الحافية
وبتبكى ورا الشبابيك
ومحمد بيعيط زيك
كان قاعد يكتب نعيك
ابن فلان و فلانة
وجوز علانة
وأبو أبصر مين
وقريب و نسيب عائلات
أسماء عناوين
وابنك واقف ياخد عزا والده
والجرسون اللى بيعمل قهوة
عرقه مصفر ياقته
كله بياخد وقته
وأنت ماخدش وقت
قررت تموت
وقت ما أموت بالضبط
أنا وأنت صحاب و حبايب
من وقت الشِعر الخايب
ولحد الشَعر الشايب
من وقت الأوتوبيس اللى معدى و بيسلم
على أجزخانات و قهاوى و حنفية ميه
وبتوع فخار، ومصاطب وأزيار
وصعايدة بيبعوا خيار
وكلوبات سهرانة
ولحد ما رحنا الجامعة
والكشاكيل فى الأيد عرقانة
من وقت مصايف رأس البر وجمصة
والسهرة مع الطاولة هزار
ولحد ماشفنا ولادنا كبار
مش عارف أقولك حاجة
لكن أوعى تموت بسذاجة
احنا صحاب و حبايب
حنسيب الأرض
ولحد ما نوصل لسمانا
نمسك إيد بعض
ونودع قرآن معزانا
ونقول للناس الحزنانة
يمكن فى الموت .... حنعيش
*أمين حداد - ديوان فى الموت حنعيش - دار ميريت*