الأحد، فبراير 28، 2010

جيانج نام - أغنية المغزل

ترجمة فؤاد حداد

رابط ورا المنحدر
لو كان خيال لو قدر
ما كانش يتنفس
فتح عينيه كلها
في الظلمه يتحسس
بتسأله يقول لها
هي البلد ديه ؟...
آدي المطاحن وآدي
الجوز في بطن الوادي
والقنطرة على فين موديه
مبنيه بالبامبو
تهتز تحت الرجل
سموها كوبري القردي
ماعادش الا يقر :
بلده اللي قدامه !

بيسمع الضحك اللي واصل هنا
يتخيل الأولاد هناك يلعبوا
وبيسمع الرز اللي بيدقوه
بيسمع حفيف النول
وبيعض شفته

آه يا غنا المغزل
أصبحت ليه محزن
سقت الأنين
على مين
من أهلك الغايبين ؟

لسة البلد سهرانه
ومراته سهرانه
بتدور المغزل
في ضي لمبة جاز
عينيها تتزلزل
آه يا أعز وليفة
على عيونك دواير من سهر وهموم

ولسه إبنه بيلعب
الحرب طول النهار
في جانب الأنصار
طول النهار ولا يتعب
لو سيبوه فيه حيل
يلعبها طول الليل
أنا يا إلهي سلاحي مصوبه على مين
على إبني ومراتي عيلتي هي دي حيلتي
آه بس لو كنت تسكت يا غنا المغزل
يا حلو بزيادة يا حنين بزيادة

قالوا له إثبت خلي إيدك ثابته
ماتفرقوش كل البلد فيت كونج
قالت له عينه هو فين العدو
قالت له ضد مين باتسلح
جسمه إرتعش مسروق
نزل سلاحه لتحت

أما وراه ومستتر في الظلام
منطق جديد بيلفه في الإجرام
أما اللي قدامه غنا المغزل
زايد حلاوة وزايد الحنية
مسح كعب البندقية الندى
وركن عليه راسه اللي مش قادره

الليل يبين والديوك تدن
على صوتها بيعدي أول سحاب وردي
والطير يقوم من نومه يبدر غنا
ويبص يلاقي القش فوق السطوح
يكسر عليه ويلوح خيال الجوز
الرز عادوا من جديد يضربوه
ودوروا المغزل كمان من جديد
حسه على ترتيب حنين حلو
اهجم
وقف
لسه ما فاقش لنفسه وبيرتجف
الأمر
قال للأمام إتجاهي
والبندقية معمرة يا إلهي
دارت عينيه على كل جار منه
كل البنادق زيه متنكسه
كل الأيادي زيه مرعوشه
سمعوا ولد مفزوع
وبيجري منه صوات
إلا وخيال طول السنين والف
بيعدي حول السكة زي السهم
قدامه راح واقف
اضرب
صرخ الخيال لأ ما تضربش
كل السلاح للأرض بيطاطي
مش أمهاتنا دول ونسواننا
آه يا هواننا للأبد لو نضرب
جازز على سنانه
سال من شفايفه الدم
قال عمري ما أضرب على أهلي

ما لحقش يملك جسمه لما إتهد
لكن جمع ع الأرض صوته وزعق
آخر ما فيه من قوة آخر رمق
قال العدو في ظهرنا
طبقت عليه السما
صوتك يا مغزل رمى
عليه حلاوة و حنان
ومرحمه
وكأنه نفس الولد
بتهننه أمه في نفس البلد
على شط نفس الترعة.. كان يا ما كان
كان يوم..
وبلدنا بالليل ما عادتشي تروح في النوم
طول ما يغني النول
في صوته حنين حلو
رغم العذاب والفظايع إحنا ما بنرجعش
طول ما قرب النار
في كل ليله بتتولد وتعود
من قلب مغزل غزل غنوة أزل وخلود

* فؤاد حداد - ديوان قال التاريخ أنا شعري إسود - ديوان مترجم عن الفرنسية لشعراء فيتناميين و نشر عام 1968 - الأعمال الكاملة المجلد الثاني - الهيئة العامة لقصور الثقافة

ليست هناك تعليقات: