الأحد، مايو ٣٠، ٢٠١٠

رجب الصاوي - الضوء المزغلل

صبح ومسا.. ما فضلشى غيرك
ما فضلشى غيرك ..
كل ما أحاول أزوغ
يقفشنى طيرك
تندهنى أصواتك .. بعيدة
يصرخ باجور
ربيت وراور فى العشش
وطيور ..
ودفنت جسمى فى الماجور
ما أحاول .. الا وتجينى فى منام
ما أقوم .. الا وطواطك يحوم

الشمس طلعت بسيطة
بدأت بضوء أحمر
خيوط من المرمر
نقطه ندى سكر ..
وتنهيدة
ونفس عزيز انقطع
وشمس طلعت
وشمس نزلت
وشمس عامت فى العصب
دابت خيوط الدهب
واتفتت الحصو القديم
والزرع لاخضر
وريحة فاحت فى الهشيم
وكنت باصغر ..
كل مادا كنت باصغر
لونى أزرق .. لونى أصفر
كل مادا كنت بتاخد
وباتذكر ..
لونى شاحب
والجو معكر
ولقيتنى بتبخر .. وغايب
وباحس بالنبض البسيط
وبالشمس البسيطة
بكا غريب ..
خلانى شايف طشاش
العش أعشاش
والصورة ست أوشاش
والعين كبيرة .. زى عين الشمس


* ديوان "عناقيد الشمس" - الهيئة المصرية للكتاب

ليست هناك تعليقات: