الاثنين، ديسمبر 07، 2009

عبد الرحمن الأبنودي - ضلّ الجو

ننام من غير وَنَس.
ننام زي الجثث.
كإننا بيتين.
كإننا موتين.
وانتي اللي كنتي لابتسام..
وانا اللي كنت العين.
دلوقت بيضايقك دراعي ان لَمْس
دراعك الممدود.. ويقتلني انا
هَمْس النَّفَس.
إيه اللي كان وانطفى.. ؟
إيه اللي كان.. وانطلق ؟
إيه اللي كان وانحبس.. ؟
جسِّي شفايفي بْصَوَابِعك
وحسي طعم العبث.

شبابيكنا من غير هوا
شبابيكنا من غير ضوْ.
البحر مرصوف بلاط
والأوضه وِسع النوْ.
أنا وانتي نجم فْ تراب
أنا وانتي ضلّ الجو.

سبتمبر 1970

* عبد الرحمن الأبنودي - ديوان الزحمة - الأعمال الشعرية الكاملة - الجزء التاني - مكتبة الأسرة 2007

ليست هناك تعليقات: