الاثنين، فبراير 11، 2008

فؤاد حداد - كل الكل

إلى محمد المصرى.. ونتعلم إن فرحة الحب مابتعيشى إلا تحت النور ووسط اللمة.
*
فرحة الحبيبين بحبهم كل ما تتقسم على الناس تفيض، يتسندوا عليهم وقت الضعف، ويتعوذوا بيهم وقت الحسد، ويغنوا معاهم وقت الوحدة، والأحباب يرفعوا حبهم تعويذة ضد الزمن، يا محمد، حبايبنا، هما السهيرة وقت السهر، هما الحضن وقت البكا والدمع، مطرح ما نقسم معاهم فرحتنا تزيد، مطرح ما نقسم حزننا يختفى.
*
هات كـــل الدنيــا تنـــــوّر
هات كـــل الدنيــا تغــــني

أنـا صاحي الفجـر وخايف
لا النسمــــه تكـــون قلقتها
أنــا باســـأل عنـــها لقيتها
الحلــــوه بتســــأل عـــني
أنــا زي الحنــه فـي إيدها
هات كـــل الدنيـــا تغـــني
هات كـــل الدنيـــا تنـــوّر

أنــا زي الحنــه فـي إيدها
زي الحنـــه فــــي الكــف
باتشمـّــس تحـــت السقف
أنــا ليــــله جديـــده وألف
زي الزغروطه في ريقها
هات كـــل الدنيــا تنــــوّر
هات كـــل الدنيــا تغـــني

زي الزغروطه في ريقها
تعـــرف للجـنـــه طريقها
أنــا قلبــي الطايــر طايــر
بيســـبح للـــي خالـقـــــها
أنــا زي الحلـــم معــــاها
هات كـــل الدنيــا تنــــوّر
هات كـــل الدنيــا تغـــني

أنــا زي الحلـــم معــــاها
الدنيــا اللـــي مطــاوعاها
م الفرحــه مـــش سايعاها
والرايحــة تقــول للجــايه
والحنـــــه تقــول للفـــــل
هات كـــل الدنيــا تنــــوّر
هات كـــل الدنيــا تغـــني

والحنـــــه تقــول للفــــــل
والشمــس تقــول للقمـــره
والريحــه تقــول للزيــــنه
إحنـــا بقيـــــنا لبعضيــنا
هات كـــل الكـــل الكــــل

هات كـــل الدنيـــا تغـــني
هات كـــل الدنيـــا تنـــوّر

الأعمال الكاملة لفؤاد حداد - الهيئة العامة لقصور الثقافة - من ديوان عيل على المعاش "الشخاليل" - الجزء الخامس

هناك تعليق واحد:

محمد المصري يقول...

كنت راجع من إسكندرية مبسوط جداً وبعدين حصل حاجة بايخة ضايقتني ولما دخلت على جوجل ريدر لقيت فيه بوست جديد على البلوج

الله يا حسين بجد

أنا بحب القصيدة جداً خصوصاً الكلمة المفضلة بالنسبة لي فيها "أنا زي الحلم معاها" اللي كل ما أوصله أحس يعني إيه "حُب"

اللي عايز أعلق على كلامك انتَ


يا محمد، حبايبنا، هما السهيرة وقت السهر، هما الحضن وقت البكا والدمع، مطرح ما نقسم معاهم فرحتنا تزيد، مطرح ما نقسم حزننا يختفى

جات في وقتها أوي يا حسين

غرقانة في روح فؤاد حداد وعشان واحد يكتبها كده لازم يكون فيه حتة منه

مش هشكرك على القصيدة - اللي المفروض تهدى لريم مش ليَّ :) - ومش هشكرك على كلامك ، عشان الاتنين أكبر شوية من كلمة شكر

أنا هقولك الإحساس اللي حسيته لما قريت البوست على بعضه مرة واتنين وتلاتة بصوت عالي وابتسامة مالية الروح

انتَ جميل يا واد