السبت، فبراير 05، 2011

أحمد فؤاد نجم - شيّد قصورك

شيّد قصورك عَ المزارع
من كَدّنا وعمل إيدينا

والخمارات جنب المصانع
والسجن مطرح الجنينه

وأطلق كلابك في الشوارع
واقفل زنازينك علينا

وقلّ نومنا في المضاجع
آدي إحنا نمنا ما اشتهينا

واتقل علينا بالمواجع
إحنا اتوجعنا واكتفينا

وعرفنا مين سبب جراحنا
وعرفنا روحنا والتقينا

عمال وفلاحين وطَلَبه
دقّت ساعتنا وابتدينا

نُسلك طريق ما لهش راجع
والنصر أقرب من عينينا

النصر أقرب من إيدينا

* الأعمال الكاملة لأحمد فؤاد نجم - دار ميريت
** الأغنية بصوت الشيخ إمام عيسى

ليست هناك تعليقات: