السبت، يناير ٠٦، ٢٠٠٧

رجب الصاوى - مالحقناش


مالحقناش الطوب الرملى
ومالحقناش الطوب الطفله
ومالحقناش الدنيا البمبى
ومالحقناش ياخدونا فى غفله
ومالحقناش..
علشانك حنحب بلاش
ونموت م الصدمه
علشانك الدنيا بتسوى
ومابتسواش
والقلب بيغوى ، ومابيغواش
بقى لون الأزمه
وانا طول عمرك بأستنى
وطول عمرى مابستناش

وسكنا فى كل شوارع مصر ، وماسكناش
وعيونى فقيرة..
وعيونك مابتستغناش
باتفرج على ضحكه أبويا
وضحكه أخويا
وبعد الغربه كأنه ماجاش
والليل بيطول..
فى بيوت الناس الليل بيطول
والشمس بتضحك فى بيوت الأوباش

كل اللى ما بينى وبينك ساكت
كل اللى ما بينى وبينك .. متحاش

* الشاعر رجب الصاوى - عناقيد الشمس - الهيئه المصريه العامه للكتاب
أقرا لرجب الصاوى هنا وهنا ،وهنا

هناك تعليقان (٢):

nona يقول...

و الله و بقيت مدون جميل يا حسين و الغريب ذوقك المتطابق مع ذوقى مش بس فى الشعراء و لكن كمان فى القصايد مع انى كنت فاكرة ان مملكتى ليست من هذا العالم ع العموم شكرا لتوضيح المعلومة
نهى حسن

big big girl...in a big big world يقول...

جميله جميله جميله
جزاكم الله خيرا