أنا زعلان جداً جداً علشانك
يا ميت فى أوانك
قبل أدان الديك
أنا زعلان جداً جداً علشانى
مش راح أشوفك تانى
يا أعز صديق
والناس فى الشارع ماشية
وماهيش شايفة البنت الحافية
وبتبكى ورا الشبابيك
ومحمد بيعيط زيك
كان قاعد يكتب نعيك
ابن فلان و فلانة
وجوز علانة
وأبو أبصر مين
وقريب و نسيب عائلات
أسماء عناوين
وابنك واقف ياخد عزا والده
والجرسون اللى بيعمل قهوة
عرقه مصفر ياقته
كله بياخد وقته
وأنت ماخدش وقت
قررت تموت
وقت ما أموت بالضبط
أنا وأنت صحاب و حبايب
من وقت الشِعر الخايب
ولحد الشَعر الشايب
من وقت الأوتوبيس اللى معدى و بيسلم
على أجزخانات و قهاوى و حنفية ميه
وبتوع فخار، ومصاطب وأزيار
وصعايدة بيبعوا خيار
وكلوبات سهرانة
ولحد ما رحنا الجامعة
والكشاكيل فى الأيد عرقانة
من وقت مصايف رأس البر وجمصة
والسهرة مع الطاولة هزار
ولحد ماشفنا ولادنا كبار
مش عارف أقولك حاجة
لكن أوعى تموت بسذاجة
احنا صحاب و حبايب
حنسيب الأرض
ولحد ما نوصل لسمانا
نمسك إيد بعض
ونودع قرآن معزانا
ونقول للناس الحزنانة
يمكن فى الموت .... حنعيش
هناك ٧ تعليقات:
اختيارات جميلة واسم المدونة نفسه غير تقليدي إلا صحيح ما سر التسمية إن جاز لي أن أسأل؟
مش عارف ، دى حاجة كده جت من العقل الباطل بس أغلب الظن انى بالشعر إدروشت و مسكته سيف خشب زى ما الدراويش بيمسكوا سيوف خشب فى الشوارع فى القصص الشعبية
سيف خشب وعرفناها طب والسهروردي؟!
السهروردى الحقيقى كان شاعر متصوف فيلسوف و عالم رياضيات - كل ده فى بعض - و كان إمام دار التصوف فى عهد الدولة الأيوبية و ناقش منطق أرسطو فى كتبه و له شعر تصوف عظيم حنشره أنا تباعا
و كانت أول معرفتى بيه فى رواية سعد مكاوى الجميلة لا تسقنى وحدى
أما إختيار الأسم نفسه لأنى بحب التصوف و شعره و الفلسفة و إنجازات الحضارة الأسلامية عموما
أرجو أكون أجبت عن تساؤلاتك :)
أهلا و سهلا بيك فى المدونة :)
يا حبيبي يا حسين أختيارك ممتاز أنا فعلً فخور أن أنتا أخويا
:وش مكرمش
مع إن تعليقك مكون من أربع حروف لكنها بتكون جملة تعبر عن رضاك
:زنجى
أنت حتصيع ياد ... ماشى ... لما أشوفك فى البيت
امتي في الاسبوع الجاي
إرسال تعليق