عبد الوهاب البيّاتى – أحزان البنفسج

الملايين التى تكدح، لا تحلم فى موت فراشة
وبأحزان البنفسجْ
أو شراع يتوهج
تحت ضوء القمر الأخضر فى ليلة صيفِ
أو غراميات مجنون بطيفِ
الملايين التى تكدحُ
تعرى
تتمزقُ
الملايين التى تصنع للحالم زورقْ
الملايين التى تصنع منديلاً لمغرمْ
الملايين التى تبكى
تُغنى
تتألم
فى زوايا الأرض، فى مصنع صُلب أو بمنجمْ
إنها تمضغ قرص الشمس من موت محتمْ
إنها تضحك من أعماقها
تضحك
تغرم
لا كما يغرم مجنون بطيف
تحت ضوء القمر الأخضر فى ليلة صيف

...
الملايين التى تبكى
تغنى
تتألم
تحت شمس الليل باللقمة تحلم

ديوان "أشعار فى المنفى" – دار الكاتب العربى للطباعة والنشر - 1968

فؤاد حداد - خطوة فى بكره غنوة فى بعده

خطوه فـى بكره وغنوه فـى بعده

وزمــــانهم كلـــــــهم اتهــــــدّوا

وطلــع غيـــرهم ألعـــن منــــهم

وطلـــع غيــــرى أجـــــدع منى

حســــــّه بيـــــــبرق زىّ الننى

ضحـــكه القمـــــحى بيطمــّـنـّى

باستــغرب ساعـــة ما باشـوفه

لـــو سِنـــّه أكبــــر مــن سِنـّى

واعــرف إنــى غبـــــت شويّه

وباعــوم فـى الهــوا زىّ الميّه

المــــرّه دى المـــــــرّه الجايه

أراجوز إنســان أنـا مش جنّى

الأعمال الكاملة لفؤاد حداد - الجزء الثالث - الهيئة العامة لقصور الثقافة

أحمد حداد - ريحة إمبارح

ريحة النهد
ريحة المهد
ريحة النهد فى جنينة الحيوانات
ريحة الملايات
ريحة الصابون فى الفُوَط
ريحة الكلام فى النُوَت
ريحة الجبنة فى طابور المدرسة
ريحة تراب المكنسة
ريحة البراح والنجوم
ونفتلين الهدوم
ريحة الكتب ع الرف
نجيب وديستوفيسكى
ومية الحنفيّة جوّه قزايز الويسكى
ريحة اللمون والمانجا
ريحة خشب الكمنجة
ريحة خشب المسارح
وخشب الأجزخانة
ريحة دوا الكُحة
ريحة صورنا القديمة
ريحة محّل فاتح
من إمتى.. ماتعدّيش
كل امّا باتنفّس باعيش
وباشّم..ريحة إمبارح

أحمد حداد - ديوان (حبّه تراب) - دار ميريت*

رجب الصاوى - مشهد حى

مسمار عجوز محنى
فى الرايحة والجاية بيلمحنى
والخنفسه طلعت على لوح القزاز
فكرت فى كرسى الهزاز
تعبان دخل ع الأوضة طاير طير
منفوخ ورافع دماغه
حاولت أجيب داغه
أصب واشرب من السم اللى أصداغه
موت الحمام لسه بيحزننى
سمعت صوتك بيعلى كل ما تضحك
عرفت إنك بتكره.. قعدة البرواز

* رجب الصاوى - ديوان "عناقيد الشمس" - الهيئة المصرية للكتاب