فؤاد حداد - الطاسة

جورج أبيض قبل ما يدخل على
خشبة مسرح برنتانيا الربيع
كان يسخّن ياخد كام قلم
مستحيل تلقى مُمَثّل أو شجيع
ينفع العالم بإخلاصه المريع
او بتمثيله البديع
أو ينادى لَيْلَى فى الكون الوسيع
بَلَكون جولييت يشقق بالنغم
والهلال والنجم زى اللى اترَسَم
فى مزاج الترسو والفن الرفيع
أو يا ليل يغزو بخيل تلبس جِزَم
ألف مرّه تدوس على الكدب الوضيع
ذا أوان الشدّ فاشتدّى زيَم
بلهوان امتدّ أو تركى بَجَم
لم يطُلْ لَيْلى ولكن لم أنَمْ
أو يحلّ اللغز لَمْ يسقط صريع
أو يفشّ الغِلّ أو يشفى الورم
أو يخلّي البغى والباطل يضيع
أو يجيب الضّى من طىّ الظُلَمْ
قد سَرَى الدفء بأطراف الصقيع
تاني أو مفرد مذكرْ أو عَلَم
ينتصر للحقّ ينهض بالهمَمْ
لاجل توفى بذمة الدنيا ذِمَم
أو يخلّى التهمة تثبت لا تضيع
ع اللى كل مال اليتيم يا مُحْتَرم
أو يخلّى العدل قادر مستطيع
أو يخلّى السيف يشوف اللى ظَلَم
أو يخلّى الورد يا عبد الحكم
يشبه النكته على الماضى الشنيع
أو يخلّى الذئب من حقّ القطيع
أو يخلّى الطفل سقّف وابتسم
أو يخلّى الصاله يا عبد السميع
اللهم اجعله خير واشفى الصمم
شعشعانة ضحك فى منظر وديع
غير ما تبقى قدمه هىّ القدم
اللى شايله وحاطّه فى قلوب الجميع
- ارفعوا ستارة برنتانيا الربيع –
جورج أبيض سُخْن واخد كام قلم

تذييل:

ما سَخَر من شعرى غير واحد افندى
كلّ دا قلته لوحدك؟ أى نَعَم
كـــلَ دا قلتـــه لوحدى
أربعين مليون لوحدى
ثـمّ فـوق النيـل معدّى
الأمل ادّانى ريق
ادّانى ريف
ادّانى ريع
شاعر الشعب اللى أعلى من الهرم
بافتكر نفسى حمامه من الحَرَم
دحرجتني على فدّان الكرم
حكمه راكبه تغنّى فى القطر السريع
كل شخص من الزمان اللي اترحم
لمّا يدخل في زمان المشاريع
لو يرقَّص حاجبه من فرط الألم
لَمْ يُلَمْ بالمثل يا عبد السميع
إنّ يَرُد الصاعَ ألفاً لَمْ يُلَمْ


* فؤاد حداد - من ديوان ميت بوتيك - دار المستقبل العربي - 1987