عبد الرحمن الأبنودي - وجوه على الشط - مقطع من (في بلاد التهجير)

أخضر يا ورق النعناع
أبيض يا زهر التفاح
صوتك ليه في الجو حزين يا ديك الصبح .. ؟
ليه .. ؟ مع إن صباحنا أحلى صباح .. ؟
يا لله يا ناس بينا عَ الأرض ..
يا لله يا بو القردان خلفي ..
واتمخطر تاني زي زمان.
لسه في الأرض ديدان يا بو القردان.
وحتفضل طول الدنيا .. الأرض ..
يكون فيها ديدان.
إنشالله ولعت شظو ودْان..
راح نزرع فيها يا بو القردان
وانتَ تنقي الديدان.
مهما الموت طلَّع مصارين الأرض ..
برضه حييجي بكره ..
وبرضه حيزرعها الإنسان.
إتسعْري يا حرب.
هاتي كل ما عندك.
أنا والأرض ..
مش ممكن حنسيب بعض.

* ديوان وجوه على الشطّ - الهيئة العامة للكتاب - عام 1975 (مكتبة الأسرة - سلسلة الأدب - مختارات من الشاعر عبد الرحمن الأبنودي - 2006)