اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مسحراتى
منقراتى
بإيدى نقره
واتنين بقلبى
مطلوب أجوّد
واقول وازوّد
وأنا باحوّد
يا دوب وباحبى
بإيدى نقره
واتنين بقلبى
يا مشربيّه
فى المغربيّه
سرحت بيّه
والليل سرح بى
بإيدى نقره
واتنين بقلبى
يا هلال غويتِ
الدنيا وغزيتِ
على بحر زيتى
طلعت مراكبى
بإيدى نقره
واتنين بقلبى
صبح هلالى
قمر ملالى
طلّ و ملالى
وقسم لى نايبى
بإيدى نقره
واتنين بقلبى
دقت القطايف
شفت اللطايف
خيالى طايف
فى عيون حبايبى
بإيدى نقره
واتنين بقلبى
بإيدى نقره
وبقلبى عشره
سبحانَ رَبّى
ماخافش عثره
على أرض خضرا
من غير مخاطره
والمشى طاب لى
والدق على طبلى
ناس كانوا قبلى
قالوا فى الأمثال
"الرجل تدب مطرح ماتحب"
***
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال :
سهرت ورديّتين والصبح ورديه
رجّعت للبحر ألحان المراكبيه
والزند شمر وزف الأرض والميه
من شط للتانى والعالم معديه
والقلب دقاته دقات الصنايعيه
اصحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصحى يا نايم يا نايم اصحى
وحّد الرزاق رمضان كريم 
هناك تعليق واحد:
الله يا حسين.. الله ع المقدمة والقصيدة والغنوة (المسحراتي) المصاحبة - عمري ما سمعت دي بالذات قبل كده
الله عليك
رمضان حقيقي كريم
إرسال تعليق