الثلاثاء، يوليو 24، 2007

أحمد حداد - ريحة إمبارح

ريحة النهد
ريحة المهد
ريحة النهد فى جنينة الحيوانات
ريحة الملايات
ريحة الصابون فى الفُوَط
ريحة الكلام فى النُوَت
ريحة الجبنة فى طابور المدرسة
ريحة تراب المكنسة
ريحة البراح والنجوم
ونفتلين الهدوم
ريحة الكتب ع الرف
نجيب وديستوفيسكى
ومية الحنفيّة جوّه قزايز الويسكى
ريحة اللمون والمانجا
ريحة خشب الكمنجة
ريحة خشب المسارح
وخشب الأجزخانة
ريحة دوا الكُحة
ريحة صورنا القديمة
ريحة محّل فاتح
من إمتى.. ماتعدّيش
كل امّا باتنفّس باعيش
وباشّم..ريحة إمبارح
أحمد حداد - ديوان (حبّه تراب) - دار ميريت*

الخميس، يوليو 05، 2007

رجب الصاوى - مشهد حى


مسمار عجوز محنى
فى الرايحة والجاية بيلمحنى

والخنفسه طلعت على لوح القزاز
فكرت فى كرسى الهزاز
تعبان دخل ع الأوضة طاير طير
منفوخ ورافع دماغه
حاولت أجيب داغه
أصب واشرب من السم اللى أصداغه

موت الحمام لسه بيحزننى
سمعت صوتك بيعلى كل ما تضحك
عرفت إنك بتكره.. قعدة البرواز

* رجب الصاوى - ديوان "عناقيد الشمس" - الهيئة المصرية للكتاب